موجة من الغضب والانتقادات تنفجر في وجه مقدمة برنامج «صبايا»، على قناة «الحياة» ريهام سعيد، بعد استعمالها بعض الكلمات الواصفة لأصحاب السمنة، مثل كونهم «أمواتًا» و«تشكل البدينات عبئًا مجتمعيًا»، دفعت أعدادًا من الفنانين إلى الوقوف أمامها بتعليقاتهم رافضين موقفها، وهي المرة الأولى التي تتلقى الانتقادات بتلك الكثافة من «أبناء الكار».
أخبار متعلقة
بدأت الانتقادات بتعليق الفنانة إنجي وجدان على كلماتها، مُنتقدة تصرفها، من خلال «إنستجرام»: «أنا مابحبش أتكلم عن حد ولا أعمل مشاكل مع حد، لسه متفرجة على فيديو لريهام سعيد بتقول فيه إن التُخان ميتين وإن هما عبء على الدولة».
وتابعت عبر «إنستجرام»: «أستاذة ريهام حضرتك كنتي عيانة أو عيانة أو معرفش، أنا واحدة تخينة ومعنديش كل المشاكل دي وغيري كتير، وكنت متعاطفة معاكي جدا لما أعلنتِ إصابتك بمرض نادر، وكنت بدعيلك، وناس كتير كانت ضدك وبقت بتدعيلك لما أعلنتي مرضك، فمش من صالحك إنك تضايقي الناس وتغلطي فيهم وتغلطي في شكلهم.. أنا رياضية طول عمري، وتخنت، واتجوزت وجوزي رفيع وأُعجب بيَّ رغم إني تخينة، وخلي بالك في ناس مريضة وتخنت وفي ناس عندها مشكلة في الغدد، وفي ناس تخان ورياضيين وممكن يكونوا أحسن منك في الجيم، ومش من حقك تقولي التخان ميتين، أنا أهو عايشة وبمثل وبدي للناس أمل مش بكأبهُم، ودور الإنسان إنه يعطي للناس أمل، لكن لما تقولي لشخص تخين إنه ميت فإنتي كده بتقضي عليه تمامًا».
وسرعان ما يلحق بها السيناريست تامر حبيب، ساخرًا، عبر حسابه الشخصي على «فيسبوك»: «طيب التخين ممكن يخس، إنما الريهام ده يا حرام يعمل إيه؟»، وترد «سعيد» مُدافعه عن نفسها: «عيب حد مثقف زيك ياخد جملة من وسط حلقة زي الناس العادية، عيب أوي إنك تتكلم بالطريقة دي وإنت نفسك مبتقدرش ترقص وتبقى بوبي الحبوب غير لما عملت عملية وخسيت، نزلت من نظري أوي».
كذلك الفنان صلاح عبدالله، كتب عبر «تويتر»: «أنا تخين وكرشي متر قدامي، ومش ههري ولا هلقش على ريهامي».
وتحتد المعارك من بعدها بين الفنانة زينة و«سعيد»، وعلّقت الأولى أسفل فيديو «وجدان»: «والله ما في عبء على الدولة غيرها بتقل دمها وكذبها مدعية المرض، مريضة عمليات التجميل، بتتريق على الغلابة اللي بيلبسوا عبايات وإسدال، أنا مش فاهمة ليه تبقي موجودة واحدة زي دي أساسًا، منتهى عدم الاحترافية والتنمر فاضل تعمل إيه تاني علشان تمشي تشتم الناس بالأم والأب؟».
وبالطريقة ذاتها وبمقدار من الغضب، يعلّق لاعب كرة القدم المعتزل، أحمد حسن، عبر «إنستجرام»: «بصي يا ريهام هكلمك عملي وبدون تنظير.. شايفة الست القمر السمينة دي! تبقى أمي وفي زيها ملايين من أمهاتنا وإخواتنا العظيمات إللي جابوا رؤساء وعلماء ومبدعين ورياضيين وفنانين وإعلاميين للأسف إنتي واحدة منهم وناجحين في كل المجالات في البلد».
وأضاف «حسن»: «الناس دي تعبوا وشقيوا وعرقوا واشتغلوا وعلموا ولادهم حاجات كتيرة في مشوار الحياة، الأمهات دول بركة حياتنا وكفاية دعوة واحدة بس منهم تريح القلب وتفتح الأبواب المقفولة الناس دي اللي إنتي متعرفيش عنهم وعن ظروفهم حاجة، إنتي اتكلمتي عنهم بسوء لأنك باختصار معرفتيش قيمتهم ولا هتعرفيها لأن الناس اللي وصفتيهم بالميتة دول مبيموتوش حتى ولو رحلوا عن الدنيا لأننا بنعيش بكل حاجة حلوة علموها لينا وسابوهلنا وبيسبوهلنا».
واختتم «حسن»: «يا ألف خسارة على الإعلام اللي بدل ما يعلم وينصح ويقدم رسالة محترمة بقى يسخر وينظر على الطيبين اللي فاضلين في حياتنا، نصيحة لوجه الله على الملأ زي كلامك ما كان على الملأ.. راجعي نفسك وحاولي تعتذري لكل الناس اللي زعلتيهم جايز يسامحوكي».
ومنذ ساعات، قام الفنان إيساف عبر «إنستجرام»، بنشر صورة بصحبة إحدى زميلاته بالوسط الفني: «عندًا في ريهام سعيد وردًا على كلماتها العنصرية الجارحة المفتقدة لأي نوع من أنواع الإنسانية والذوق ياريهام احنا كلنا جينا الدنيا في حاجات خارجة عن إرادتنا اخترناها أو ماخترنهاش كمخلوق خلقه الخالق العظيم، بس بقى اللي بكامل إرادتنا اخترناه هو لساننا وهي أخلاقنا وتصرفاتنا، فهما دول اللي نقدر نحاسب بعض عليهم ده لو أصلا ده كان دورنا أننا أصلا نحاسب بعض أو نتنمر على بعض، لكن دعي الخلق للخالق أحسن وتبقي ريحتي واستريحتي».
واستكمل: «عامة أنا أي حد من صحابي مكلبظ شوية أنا بموت فيه واحنا كلنا بنحبه ومانقدرش أصلا نعيش من غيره وشرف لينا كمان معرفته، وكلبظته دي مش حاجة تذكر أصلًا، العيوب جوانا مش برانا وإحنا كلنا عيوب»، ولا تزال تعليقات الفنانين مُستمره بين الساعة والأخرى.
