نفسى ارتاح في أيامى الباقية.. شغال طول عمرى زى الساقية.. نفسى اتفسح مع ناس راقية.. أسبوع في مارينا أو في مراقيا.. واغمض عينى وانسى الهموم.. واحجز في فندق سبع نجوم.. واخد حمام شمس بعد ما اعوم.. واتمتع بهدوء والسما والنجوم.. وادخل بوفية مفتوح واتعامل بذوق.. واكل المحمر والمشوى وانسى المسلوق.. لا اشيل هم أكل ولا نزول سوق.. والحلو مشكل والفاكهة تفاح وبرقوق.. ويبقى أكل ومرعى وقلة صنعة.. والبس نضارة وكاب وادارى الصلعة.. واتمشى على البحر والشمس طالعة واتعزم على رحلة صيد مع ناس جدعة.. لكن أنا عارف الأيام هتجرى ثوانى.. وارجع اتربط في الساقية تانى.. واسمع الإزعاج اللى بيخرم ودانى.. ونفسيتى تتعب وأقول إيه اللى ودانى؟.
سليم نقولا- القاهرة الجديدة
