يشهد الرئيس عبدالفتاح السيسي، الأحد، الندوة التثقيفية للقوات المسلحة بمناسبة يوم الشهيد.
أخبار متعلقة
رسائل عديدة وجهّها السيسي، خلال مداخلة أجراها في الندوة.
«كُنا حريصين ألا يُصاب مصري واحد»
قال السيسي في بداية المداخلة: «أنا هحكي حكاية نوفمبر، في نوفمبر 2011، كان أحداث (محمد محمود)، وفي الفترة دي كُنا إحنا موجودين، أنا بذكركم بمشاهد وأحداث مرت علينا، إحنا كُنا حريصين ألا يسقُط مصري واحد، وكان حرصنا على كل المصريين».
وأضاف: «أفتكر من سنين طويلة فاتت، كُنا بنشعر أن في حد في وسطينا دائمًا يشككنا في كل شيء، عدا الأمر الخاص بيه هو، ده لا من الأمانة ولا الصدق ولا الدين في أي شيء من الأشياء».
«أنا بقول ده ليه؟»، هكذا أكمل السيسي كلمته، إذ قال: «بصفتي رجلاً من المخابرات الحربية، كان بيسقط القتلى يوم بعد يوم، أكتر من 6 أيام، مات فيهم عشرات، واتعمل في الوقت ده منصة عشان تجيب بقية الدولة الأرض».
وتابع: «كان المطلب ساعتها أن المجلس العسكري يمشي، وعشان يمشي نعمل حالة تخلى كل الرأي العام رافض، لأن القتل اللى بيتم ده بيتم باسمه، أنا بكمل كلام دكتور أسامة. أقسم بالله، أنا قلت اعملوا لجنة لدراسة كل الأحداث في 2011 و2012، عشان تعرفوا ازاي الدول بتدُمر وبتضيع».
وعن إقامة فاصل بين شارع محمد محمود وميدان التحرير، قال السيسي: «في اليوم ده، قلت لرئيس اللجنة الهندسية، إذا متعملش فاصل بين محمد محمود وميدان التحرير، البلد هتضيع، اتقفل الشارع، انتهى القتل».
وأضاف السيسي: «الصورة اللى اتصدّرت أن المجلس العسكري هو اللى عمل كده، زي ما اتصدرت الصورة دي في ماسبيرو ومحمد محمود».
وتابع: «أنا بقولكم يا مصريين، حجم الخسارة اللى ترتبت على الأحداث دي من 2011 لـ 2015، حجم ضخم جدًا، هندفع تمن كبير جدًا. كان ساعتها تلقى مطالب (مش عارفين جاية منين) على شبكات التواصل، تاخدها البرامج بالليل، تبقى مطالب واجبة التنفيذ».
وأردف السيسي: «كان موجود معانا بعد ما جهزنا البيان، كان في مطالب كتير، منهم مطلب أن المجلس العسكري يمشي، كان الفريق محمد زكي موجود في التحرير، كنا حريصين إن مفيش مصري يُصاب أو يقتل، لكن قدمونا للناس إن إحنا قتلة وفسدة».
«أي موظف يتعاطى مخدرات هيتم إنهاء خدمته فورًا»
علَّق السيسي على حادث «محطة مصر»، قائلاً: «إحنا عملنا في قانون الخدمة المدنية الجديد إجراءات عشان نظبط أداءنا، ينفع واحد ياخد (استروكس) ويركب قطر؟، يضيع ولادنا وأهلنا الموجودين في المحطة».
وحذَّر السيسي من تعاطي مخدر «الاستروكس»: «أنا بقول الكلام ده، لأن إحنا مش هنسمح وهنحاسب بالقانون اللى وافق عليه نواب الشعب، اللى يتعاطى مخدرات، يتم إنهاء خدمته فورًا، التحاليل اللى إحنا هنعملها لازم تتنفذ بصدق وأمانة».
وأضاف: «الحاجة وعشرين اللى ماتوا دول معندهمش أولاد؟ إحنا بنقول الكلام ده عشان مش بس السكة الحديد، بقول الكلام ده على كل المرافق».
«أنا مش قلقان عليكم.. حجم الوعي عندكم بقى كبير أوي»
خاطب الرئيس عبدالفتاح السيسي، المصريين، قائلاً: «أنا مش قلقان عليكم، حجم الوعي عندكم بقى كبير أوي».
وأضاف: «في أجيال صغيرة طلعت من يناير لحد دلوقتي، في منهم ميعرفش الآثار دي، كل أب وأم بقولهم خلي بالكم من أولادكم، في ناس بتموت لأجل البلد تعيش.. قول لابنك وبنتك.. خلي بالك، لا تعبث بأمن الوطن».
وتابع: «كلام كتير أوي بيتقال في موضوع الجيل الرابع عن تطور وسائل القتال في تدمير الدول، الجيل ده مبيعتمدش على المواجهة المباشرة، بيعتمد على وسائل الاتصال الحديثة ونشر الشائعات، اللى ورا الحواسب، إنت متعرفهوش».
«هو أنا قُلت لكم معايا السمن والعسل؟»
وعن ميزانية بناء المدن الجديدة في مصر، قال السيسي: «والله كل المدن الجديدة مش معمولة على موازنة الدولة، لا تكلف موازنة الدولة شيئًا؟ طب بتتعمل إزاي؟ أنتوا بتحفروا الأرض تجيبوا فلوس من الأرض؟، الأراضي اللى ملهاش قيمة، بندخل نعمل طريق ومحور لغاية ما نعبر، نطرح أراضي للبيع، والفلوس بناخدها نعمل بيها شغل، الكلام ده ينطبق على (العلمين) وكل المشاريع الجديدة».
وأضاف: «حد يقولي أنت مش قلت الكلام ده قبل كده؟، أنا ممكن أطلع كل يوم في التلفزيون وأتكلم معاكم، بس أنتوا هتزهقوا مني، وأنا معنديش ملكات الإعلاميين».
وتابع: «يقولك دول هيعملوا في العاصمة الإدارية 200 مليار بنية أساسية، طب أسبوط الجديدة؟ طب إسماعيلية الجديدة؟ طب رشيد الجديدة؟، يا جماعة اللى بيطرح الطرح ده عاوز يألمك وينغّص عليك عيشتك».
«والله لأقف أنا وأنتم قدام ربنا.. وهحاسبكم زي ما بتحاسبوني»
«أنا مش رئيس لكم، أنا واحد منكم، والله لأقف أنا وأنتم قدام ربنا، وأسألكم زي ما أنتوا بتسألوني، وهحاسبكم زي ما بتحاسبوني».. هكذا علَّق الرئيس عبدالفتاح السيسي على انتشار الشائعات في المجتمع المصري.
وأضاف: «سألوني (إنت بتعمل كده ليه؟).. أنا خايف عليكم».
وتابع: «أنتوا عارفين عدد أسابيع المظاهرات في مصر كانت كام أسبوع؟، أنهي بلد اللى تقدر تعيش وهي بتطلع مظاهرات في الشوارع 200 مرة في 4 سنين، سياحة إيه اللى تشتغل؟، تجارة إيه إلى تمشي؟، إحنا في آخر اليوم نقول (هناكل ولا كنا في مظاهرات؟)، الاحتياطي اللى اتشكل في 20 سنة، 38 مليار، راح.. اتشطبوا في سنة ونص».
«هغشكم ليه.. هضحك عليكم ليه؟»
علَّق السيسي على الشائعات المُتناثرة عن مبادرة «100 مليون صحة»، إذ قال: «الإشاعات كتير، قالوا إن التطعيم بتاع 100 مليون صحة، هيئذي الناس، هغشكم ليه؟ هضحك عليكم ليه؟ بقى إحنا نقدر نعمل كده في نفسنا؟ أعمل كده في نفسي وولادي؟».
وأضاف: «إحنا عملنا الحملة دي لأجل نخفف عن أهلنا، كُنت متألم من فيروس سي، وموجوع منه كمصري بيتألم لأهله وناسه، عملناه عشان نخفف عن كل مصري ونطمنه، وقلنا نطمنهم».
وتابع: «قوائم الانتظار كانت 18 ألف، كان في 6 آلاف خالصين من سنة، عملنا دراسة الـ12 هيكلفونا كام؟.. أنا عاوز أقولكم خلال 6 شهور عدد اللى اتعملهم عمليات من قوائم الانتظار، تجاوزنا العدد بعشر مرَّات، تجاوزنا 100 ألف إنسان. إحنا كحكومة عاوزين نخفف عن أهلنا ولا نضيعهم؟».
«حجم التحديات في مصر مينفعش حد يواجهه بجماعته.. أكبر منك»
قال السيسي: «هفكّر المثقفين والمفكرين ورجال الدين والإسلاميين (اللى أنا قعدت معاهم بصفتي مدير المخابرات)، قلت (هتتخرب منكم)، أنا كنت بقعد معاهم بصفتي مديرا للمخابرات، من فضلكم ابعدوا أنتم عن الحكاية دي، أنتوا لكم أفكار هتبقى عائق لمصر، وهتبقى عائق كمان عليكم».
وأضاف: «لما جم سألوا وقالولي، نقدم رئيس، قلت لهم، المشكلة الكبيرة اللى موجودة معايا إني راجل صادق أوي وأمين أوي وشريف أوي إن شاء الله، هقابل ربنا عن كل كلمة وفعل عملته، مصر عايزة شعب يقوم بمواجهة تحدياتها، حجم التحديات مينفعش حد يواجهه بجماعته، لأ.. أكبر منك».
«قالولي هيحصل مشكلة في 2060.. هكون مُت وشبعت موت»
حذَّر السيسي أيضًا من أزمة اقتصادية ستتعرض لها مصر بحلول 2060، إذ قال: «عاوزين 9 مليار رغيف في الشهر، أنتوا عارفين الرغيف عشان يبقى موجود ليه حكاية، لو مش موجود، مش هتلاقيه قدام حضرتك، أنا هقولكم حاجة، قالولي هيحصل مشكلة في 2060».
وأضاف: «ساعتها هكون مُت وشبعت موت، قلت لابد من التصدي، ولا نترك للأجيال الخراب والضياع، الموضوع ده هيبان إمتى؟ 2060، قلنا نتصدّى لها ونجهز نفسنا».
«في أخطاء في وزارة الداخلية.. لكن مقتلتش الناس في التحرير»
قال السيسي: «قالوا إن الجيش خان الشرطة ودخَّل المتظاهرين الأمن الوطني، عشان ياخدوا الوثائق ويهدروا كرامة الشرطة. شوفوا الدول بتدمَّر إزاي وبتضيع إزاي، والله أنا صادق، كل يوم حكاية وحكاية وإشاعة وإشاعة».
وأضاف: «في أخطاء في وزارة الداخلية، لكن مقتلتش الناس في ميدان التحرير».
«بدي للمرفق ده واحد من أحسن ضباط الجيش»
وفي نهاية مداخلته، كشف الرئيس أنه عرض على اللواء كامل الوزير منصب وزير النقل بعد حادث قطار محطة مصر، مضيفًا أنه وافق وقال: «أنا تحت أمر مصر في أي وقت».
وأوضح الرئيس، في مداخلة خلال الندوة التثقيفية للقوات المسلحة بمناسبة يوم الشهيد، الأحد، أنه لم يتم تعيين الوزير وزيرًا للنقل حتى الآن لأنه لابد من موافقة مجلس النواب والبرلمان في إجازة حاليًا»، مضيفًا: «بدي للمرفق ده واحد من أحسن ضباط الجيش».
وخاطب الرئيس المصريين قائلًا: «سترون مرفقًا جديدًا في 30 يونيو 2020»، كما خاطب الوزير بقوله: «لك كل الدعم من كل المصريين من الجيش والشرطة وأجهزة الدولة عشان ننجح المرفق ده.. ولو عايز ضباط من أي هيئة معنديش مشكلة».
