فرح بنوتة جميلة وموهوبة جدا.. وكمان بتحب تحكى حواديت جميلة وكلها خيال وحب.. وعلشان هى بتحب الحواديت الجميلة هحكيلها حدوتة جميلة زيها.. حدوتة عن بنوتة جميلة ورقيقة وصغيرة.. شبهها كدة.. البنوتة دى كانت إسمها توتة.. وتوتة بتحب التمثيل والرقص والغنا.. وذكية جدا وشاطرة فى المدرسة.. وكمان ماما بتحبها لإنها بتساعدها وبتاخد بالها من إخواتها الصغيرين.. وتيتة دايما بتفتخر بيها.. وأى حد بيشوفها بيحبها على طول.. ومن وهى أصغر من كده وهى بتحب تعتمد على نفسها وبتحب تفكر وتاخد قراراتها لوحدها.. يعنى بتحب تختار ألوانها وألوان الفساتين الجميلة إللى بتلبسها وتحب تختار الألعاب بتاعتها بنفسها.. ودايما بتنجح بتفوق علشان هى بتقدر تفهم وتحفظ كل دروسها من أول مرة.. وكمان بتقدر تحفظ كل التمرينات إللى بتتمرن عليها..
أخبار متعلقة
من أغانى لرقصات لأدوار جميلة فى المسرحيات.. وتوتة دايما كانت بتجيب أحلى الدرجات لكن مش بتطلع الأولى.. وهى ماكانتش بتطلع الأولى علشان هى كانت مش بتحب تذاكر دروسها.. ومع ذلك كانت بتجيب أحلى الدرجات.. لكن تيتة وماما وكل الناس إللى بيحبوا توتة كانوا نفسهم إنها تستغل موهبتها وذكاءها وتجيب درجات أعلى من كل الناس.. علشان هى تستاهل تفرح أكتر من كل الناس.. وتقدر تحقق كل أحلامها الجميلة بسهولة.. وكمان علشان إخوات توتة الصغيرين لما يكبروا ويبقوا قدها وبيحبوها.. ساعتها كمان يحبوا المذاكرة ويحبوا كل الدروس ويجيبوا زيها أحلى وأعلى الدرجات.. وساعتها هما كمان يقدروا يحققوا كل الأحلام الجميلة الصغيرة إللى بتكبر معاهم كل ما بيكبروا.. ولما تيتة قالت لتوتة إن الأحلام بتكبر.. توتة ضحكت وقالتلها إزاى يعنى حلم يكبر؟!.. هو الحلم ده زرع أو إنسان علشان يكبر؟!.
تيتة قالتلها إن أى حلم بينفع يكبر زى الزرع بالظبط.. يعنى مثلا مثلا لو حلمتى تلونى وترسمى الحيطة بتاعت الأوضة بتاعتك يا توتة.. فأول حاجة بتتعلميها هى إزاى تمسكى فرشة التلوين.. وتتعلمى تختارى الألوان المبهجة.. وبعدين الرسم.. وتبدأى ترسمى الحيطة الكبيرة وتلونيها بأجمل الألوان.. ساعتها الحلم الصغير بيكبر وبيتحقق على طول.. علشان كده يا توتة الأطفال الجميلة إللى زيك لازم يتعلموا طول الوقت علشان أحلامهم تكبر ويقدروا يحققوها.. وإنتى بتحلمى إنك تبقى الأولى فى المدرسة.. يبقى لازم تذاكرى علشان تحققى حلمك وحلم بابا وماما وتيتة وكل إللى بيحبوكى.. وتوتة فعلا وعدت تيتة وماما وبابا إنها هتذاكر كل الدروس علشان كل أحلامها تبقى كبيرة وتتحقق.. وتوتة توتة بدأت الحدوتة.. ويا رب الحدوتة تعجب فرح الجميلة.. وأول ما تقراها تكتبلى حدوتة تانية كبيرة جميلة زيها وكلها خيال وأحلام وألوان.
