وجه الممثل شريف منير رسالة عتاب إلى بعض الجماهير المصرية التي انتقدت ذهاب وفد من الإعلاميين والفنانين إلى روسيا؛ لمساندة المنتخب الوطني في مباراته الأخيرة أمام نظيره الروسي.
أخبار متعلقة
وقال، في مقطع فيديو بثه عبر «فيس بوك»، صباح الأربعاء: «ذهبنا إلى روسيا لتلبية دعوة بهدف دعم المنتخب القومي، والدعوة شملت الطيران والإقامة مثل دعوات المشاركة في المهرجانات السينمائية، ولم نتلق أية مكافآت، بالعكس تكلفنا بعض المضروفات».
وأضاف: «كل ده عشان الفريق خسر، فإحنا نتحمل الموضوع يعني، هو إحنا اللي حطينا خطة اللعب؟ هو إحنا اللي لعبنا وخسرنا؟ إحنا كنا واقفين وبنتفاعل جوه الملعب زي كل المصريين الموجودين، وزعلنا لما اتغلبنا».
وتابع: «الكورة كده؛ مكسب وخسارة، إيه الغلط اللي عملناه؟ ويتقال علينا مطبلاتية ورقاصين وألفاظ مش كويسة، هو إحنا مش بنمتعكوا برضه؟ إيه الغلط اللي عملناه؟ هي مش فيفي عبده اللي أنا شاركت معاها في مسرحية حزمني كنتوا بتنبسطوا منها؟».
وتساءل: «إحنا ذنبنا إيه؟ إحنا رايحين ندعم المنتخب، حطوا نفسكو مكاننا، ولو أنت مكاننا وجت لك دعوة لحضور الماتش، بصرف النظر مين اللي طالع معاك، مش هتطلع؟ أكيد هتطلع».
وقال: «اتقال علينا كلام كبير، وإن إحنا طالعين من قوت الشعب، مش حقيقي الكلام ده، ده بند من الدعاية للشركة، وده يشرفنا إننا ندعم المنتخب، أقسم بالله إحنا مانعرف اللاعبية في أوتيل إيه، ولا شوفناهم أساسًا».
وأضاف: «الكلام جارح جدًا، معملناش حاجة مشينة، لو كنا كسبنا كنتو شيلتونا فوق الدماغ، أنا حقيقي انجرحت وزعلت، إحنا لما بنروح والله مابناخد مقابل، وأقسم بالله مرة تانية إحنا ماشوفنا اللاعبية ولا نعرف مكان إقامتهم».
وتابع: «إحنا قدمنا لكم كتير، واستمتعتم بأعمالنا، مفيش داعي تجرحوحنا أكتر من كده، ماتزعلوش مننا إحنا معملناش حاجة وحشة، وأقول للاعيبة هارد لك، هي الكورة كده، كل الفرق بتخسر».
واختتم: «من باب أولى إننا نهاجم المصريين اللي فرحانين في هزيمة منتخبنا، في ناس بيهاجموا فريقنا وبيفرحوا فيه، وقالوا علينا يا رب الطيارة تقع بينا وكإننا خونة، أنا آسف على الإطالة والانفعال، وفي الآخر أفوض أمري إلى الله إن الله بصير بالعباد».
