فى يوم عيد الورد والأزهار قررت رئيسة الورد تعمل مسابقة جميلة لكل الأطفال علشان يختاروا أمير جديد للورد والأزهار..وكان فيه شرطين مهمين فى المسابقة.. الشرط الأول هو إن الأمير لازم يكون بطل وبيعتمد على نفسه وبيحب اللعب والجمال والألوان..
والشرط التانى هو إن الأمير بيسمع نصايح وكلام ماما ومايكونش شقاوته زيادة ولا زنان.. وكان فاضل على المسابقة أسبوع كامل وفيه كل الأيام الجميلة من السبت لحد الجمعة.. وكان فيه طفل صغير وجميل اسمه مؤمن فى الحديقة مع بابا وماما بيشموا ريحة الورد والأزهار..
مؤمن عجبته المسابقة وقعد يحلم إنه بقى أمير الورد والأزهار.. وخصوصا لما عرف إنه لو بقى الأمير هيبقى سهل يحقق كل الأحلام.. مؤمن قال لبابا وماما إنه قرر يدخل المسابقة، ماما قالتله بس إنت عارف الشروط يا مؤمن إللى أميرة الورد والأزهار قالت عليها.. مؤمن قال لماما ماتخافيش يا ماما يا حبيبتى ده فاضل أسبوع بكل أيامه.. وأنا هتعلم فيه أعتمد على نفسى فى كل الأشياء وهسمع كلامك انتى وبابا وهكسب وهبقى أمير الورد..
ماما فرحت بإصرار مؤمن وقدمتله فى المسابقة.. ومؤمن يوم السبت صحى من النوم فطر لوحده وشرب اللبن من غير مساعدة من بابا ولا ماما وهو فرحان..ويوم الأحد قعد ينضف ويرتب اللعب بتاعته وكل الأوضة من غير مساعدة..ويوم الاتنين لما ماما قالتله ياللا يا مؤمن علشان أساعدك تدخل الحمام قالها لأ يا ماما أنا هحاول أساعد نفسى لإنى عاوز أبقى أمير الورد والأزهار..ويوم التلات لما شاف صاحبه ابن الجيران بيعيط ويزن عشان مامته تنفذ طلباته قعد يعلمه إنه لازم يعتمد على نفسه ويبطل زن وعياط.. وفضل كل يوم لحد الجمعة يتعلم حاجة جديدة..
ويوم نتيجة المسابقة اختاروه أمير الورد والأزهار.. ومؤمن نام فرحان هو وبابا وماما وكل الجيران.. ومن اليوم ده بقى مؤمن اسمه أمير الورد والأزهار.
