قال مرتضى منصور، رئيس نادي الزمالك، إنه انسحب من صفقة صلاح محسن، لاعب إنبي، صباح أمس لإعطاء الأهلي درسًا لم ينساه بعدما وصل لاتفاق على ضم اللاعب مقابل 38 مليون جنيه.
أخبار متعلقة
وأضاف «منصور»، في مداخلة هاتفية ببرنامج «الغندور والجمهور»: «صلاح محسن اتباع في بـ38 مليون، أنا حبيت أدي لبعض المسؤولين في الأهلي درس، علشان مايتكلموش تاني».
وأضاف: «لما خدنا عنتر اللي كانوا عاوزين يخطفوه وكان الأهلي عارض عليه 17 مليون، إحنا خدناه بـ15 مليون».
وتابع: «حتة ورقة إمبارح كلفتني جنيه، رفعت بيها الصفقة من 15 مليون لـ38 مليون. المبادئ والقيم مش محطوطة في دولاب بتتشال وتتحط. لو الموضوع يخص الزمالك نطلع نقول ده إهدار مال عام وعدلي القيعي يطلع يقول غسيل أموال، ولما يخص الأهلي يقول دي صفقة. هو في لاعب في مصر يساوي 38 مليون جنيه، يبقى فتحي بكام والسعيد وسليمان بكام، يبقوا بـ100 مليون مثلا».
وواصل: «اللي خلاني أخرج من الصفقة حتى لو بجنيه، أحمد مجاهد، عضو اتحاد الكرة، وقالي مصطفى محمد المعار لطنطا من الزمالك أحسن منه 100 مرة. ده في شباب مش لاقيه 500 جنيه علشان تشتغل. ده احنا في مصيبة، نفس اللي حصل عملته مع الأهلي في صفقة أكوتي منساه، لكنه متعلمش الدرس».
واختتم: «إحترامي للخطيب مالوش حدود، بس بقول للقيعي وسيد عبدالحفيظ لبستكوا في 38 مليون جنيه».
