مسحراتى مصر البهية
اصحى وسبّح رب البرية
مشيت أرتل وأنشد وأجود
وصوتى يجرى بين النواصى
هنا بانقر.. هنا باعوّد
هنا باحوّد عن المعاصى
لو كنت بحرى
لازم أقبّل
وإن كنت قبلى.. لزم أبحّر
ولحد آخر نفس ف صدرى
هاشد قلبى وتر واسحر
يا مصر قومى وشوفى نيلك
يا مصر قومى وضمى سينا
نهر المحبة بينتمى لك
يا مصر شوفى إحنا فين رسينا
مصر البهية.. بالعقل هية
ف الذكر آية.. ف العشق غية
اصحى وسبّح رب البرية..
■ ■ ■
مسحراتى ورمضان شاكينى
لشهر مارس وشهر طوبة
وقال عملتوا فانوسى صينى
والقمح وارد روسيا وكوبا
سمنك هولندى.. واللحمة هندى
ودهب بولندى.. لجل الخطوبة
زتون يونانى.. تكييف يابانى
طوبى لكل اللى جابه طوبى
دوا سويسري.. وحديد لجسرى
وإن شالله حتى تاكله الرطوبة
الشاى سيلانى والبن كينى
وسلاحى جاى من بلاد كذوبة
عينى السودانى من صحنى عينى
ياريته أصلاً مزروع ف جوبا
أكل الكلاب مستوردينى
مستوردينه من غير صعوبة
سجاد صلاتى إنتاج بكينى
أما البكينى مصنوع يا زوبة
فى بلاد بتصنع حليب جنينى
ونقول عليها بلاد لعوبة
وكل مكنة بموتور لاتينى
مصنوع يا عربى برة العروبة
وفين مصانعى يا أهل دينى
ولإمتى هادعم ابن الأروبة
ولإمتى هارضى لعاطلينى
يعيشوا دايماً بنفوس غضوبة
ازاى يا ربى دقيق عجينى
تعجز تجيبه أرض الخصوبة
وأنا اللى ياما اتباهيت بطينى
وبيجرى عندى نهر العذوبة
عايزين نصدر يا مُصدرينى
من أهل بحرى وصعيد ونوبة
والله خايف يا فلاحينى
يستوردلكو فرش الركوبة
■ ■ ■
مسحراتى ف الذكر هايم
والنسمة حلوة ولا حد نايم
والكل صابح معانا صايم
ف الفجر يدعى ويقول يا رب
رمضان يا أكرم م الشمس ذاتها
أرواحنا عندك تبدأ حياتها
والنفس راضية تلحق ما فاتها
تطلب هداية وتقول يا رب
المصرى بنا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يا رب
