استشهد الرئيس عبدالفتاح السيسي، السبت، في مداخلته بالجلسة الشهرية للحوار مع الشباب، بتجربة دولة، لم يذكر اسمها، في تطوير التعليم.
أخبار متعلقة
وقال السيسي: «قعدت في مدرسة تقريبًا 4 ساعات أشوف بيتعلموا إيه، مدرسة للتعليم الأساسي والدولة دي رغم أنها غنية لكن المدرسة كانت بسيطة ومتحسش إن التعليم جيد، الفصل مكنش فيه لا باب بتمشي في الطرقة مفيش أبواب للفصول، الفصل الواحد مفيهوش أبواب ولا جدار رابع، ثم لقيت بناء الشخصية اللي بتكلم عليها مش عايزين نطلع قوالب واحدة عايزين شخصية تتحد في ثوابت يبقى عندها الشخصية الكاملة».
وأضاف: «شُفت من مجموعة الأطفال والبنات محدش فيهم كان بيعرني انتباهه ولا كإني أنا واقف ولا المجموعة اللي معايا ومحدش قال لي تعالى سيلفي، ومحدش جه جنبي ولا حد بص عليا ولا حد شاورلي، اندهشت إزاي الولاد الصغيرين دول البرنامج عمل فيهم كده».
وتابع: «أنا مش مبالغ، علموهم يحترموا بعض إزاي، وظائف بتتغير دوريًا اللي يعمل الدور ده النهارده زميله يعمله بكرة، وحضرت توزيع وجبة غداء عندهم لقيت فيه قائد بيتعين كل يوم ومختلف، أنا شفتهم معينين واحد يدعو صلوات الأكل وما بعد الأكل، ومخلهمش ناس صعبة كل ده اتعمل وهما بيتسموا بالوداعة والالتزام ومفيش عنف وشدة، والمدرس لم يوجه كلمة واحدة ومقالهمش اعملوا واللا متعملوش».
وأشار الرئيس في كلمته: «أثناء توزيع الأكل، مشفتش واحد يقولي إيه ده، اللي بيتحط بياخده ويمشي، في الآخر هو صاغ شخصية تتسم بالتوافق مع زمايلها والانصياع للقيادة والانضباط الشديد، أنا بتكلم على أولاد في ابتدائي».
